"ದಾಳ"

ಅಲ್ಲಿ ಪಾಚಿಗಟ್ಟಿದ ಬಾವಿ, ಮೂರಡಿಯ ನೀರು
ಏಡಿ ಕೊರೆದ ತೂತು ಅಲ್ಲಲ್ಲಿ, ಕಪ್ಪೆಗಳ ಗೂಡು
ಲೆಕ್ಕವಿಲ್ಲದ ಹಿಂಡು ಹಿಂಡು ಮೀನುಗಳ ಸಾಲು

ಮೇಲೆ ಶುಭ್ರಾಕಾಶ, ನೀಲ ಬಾನಿನ ಮುಗುಳ್ನಗೆಗೆ
ನೀರು ನೀಲಿಯಾಗಿದೆ, ಪಾಚಿ ಎಂಬುದ ಮರೆತಿದೆ
ತಳ, ಕೆಸರ ತುಂಬಿ ಗಹ ಗಹಿಸಿದ್ದು ಕಾಣಲೇ ಇಲ್ಲ
ದಂಡೆಯಲಿ ಎರಡು ಹಸಿರು ಹುಲ್ಲ ನಗುವಿನಲ್ಲೆಲ್ಲ

ನೀರಹಾವಿನ ಸೀಳುನಾಲಿಗೆಗೂ ಮರಿಮೀನಿನ ರುಚಿ
ವಟಗುಡುವ ಕಪ್ಪೆಯೂ ರಾಗ ಮುದುಡಿಸಿದೆ ಬೆದರಿ
ಕಣ್ಣ ಮಿಟುಕಿಸುವ ಮಿಂಚುಳ್ಳಿಯದೂ ತವಕದ ಗಾಳ
ಕೊಕ್ಕ ನಡುವೆ ಮೀನ ಹೆಕ್ಕಿದ್ದೂ ತಿಳಿಯದಾ ದಾಳ

ರಾಟೆಯೊಳು ಇಳಿಬಿಟ್ಟ ಕೊಡದ ಒಳಗೂ ಮೀನು
ಇಣುಕಿ ಕೂತದ್ದು, ಪುಟ್ಟ ಬಾವಿಯ ಬಿಟ್ಟು, ನೀಲ
ಬಾನಿನ ಮುತ್ತಿಕ್ಕುವ ಆಸೆಗೆ, ಬರಿದಾಗಿ ಹಂಬಲ
ವಿಲ ವಿಲ ಒದ್ದಾಟದ ಕೊನೆಯ ಉಸಿರಿನ ಛಲ
ಹೆಪ್ಪುಗಟ್ಟಿದ್ದು ಕಲ್ಲು ತುಂಬಿದ ನೆಲದೊಳಗೆ.....