ಸ್ವಾತಂತ್ರ್ಯ!

ಮೊನ್ನೆ ಬ್ರಿಟಿಷರ ಕಂಕುಳಲ್ಲಿ ಮಲಗಿದ್ದ ಮಗು
ಆ ಇಂಗ್ಲಿಷ್ ಜೋಗುಳದಲಿ ಅಮಲೇರುವಾಗ
ತೊಟ್ಟಿಕ್ಕಿದ ಉಚ್ಚೆಯ ವಾಸನೆ ಇನ್ನೂ ನಿಂತಿಲ್ಲ!

ನೋಟಿನ ಕಂತುಗಳಲ್ಲಿ ಗಾಂಧಿಯ ನಗು ಚೆಲ್ಲಿ
ಭದ್ರಕೋಣೆಗಳಲ್ಲಿ ಬಂಧಿಯಾದಾಗ ಬಿಳಿಟೊಪ್ಪಿ-
ಕರಿಕೋಟಿನ ತುಟಿಗಳಲ್ಲಿ ಕೆಂಪು ಎಲೆಯಡಿಕೆ!

ಉರಿಸೂರ್ಯನ ನೀಲಿ ಬಿಸಿಲಿಗೆ ಸೆಟೆದೆದ್ದ ಗದ್ದೆಯ-
ಒಣಹೆಂಟೆಗಳು ಕೊಳೆತ ಈರುಳ್ಳಿಯ ಚಿಗುರಿನಲಿ
ಹೇಲುವಾಸನೆಯ ಪುಟಿದೇಳಿಸುವಾಗ ವಾಕರಿಕೆ ವಾಂತಿ!

ಸರಳುಗಳ ಹಿಂದೆ ಸೆರೆಯಾದವರ ಮನೆಗಳಲಿ
ಬಂಗಾರದ ಬೆಳಕಿನ್ನೂ ಕಣ್ಣು ಬಿಡುವಾಗ
ಬೀಡಿಯ ಹೊಗೆ ಬೀದಿ ಕಾವಲುಗಾರನ ಕಿಸೆಗಳಲಿ!

ಕರೆಂಟಿನ ಸ್ಮಶಾನದಲಿ ತಿಂದು ತೇಗಿದವನ ಹೆಣ
ಸುಟ್ಟು ಬೂದಿಯಾದಾಗಲೂ ತಲೆ ಬೋಳಿಸುವವನ
ಕತ್ತರಿ ಕಿಚಗುಡುತ್ತಲೆ ಕತ್ತರಿಸುತ್ತದೆ ಬೋಳುತಲೆ!

ನಾವೆಲ್ಲ ಸ್ವತಂತ್ರರು ನಮ್ಮ ಮನೆಯ ಮೂಲೆಯಲಿ
ಎಣ್ಣೆಯೆರೆದು ಬತ್ತಿಹಾಕಿ ದೀಪ ಉರಿಸಲು
ಇನ್ನೊಬ್ಬರ ಮನೆಯ ಸುಡಲು ಆ ಬೆಂಕಿಯಲೇ!
=====
ಚಿತ್ರಕೃಪೆ: ಫ್ಲಿಕರ್.ಕಾಮ್