ನಿದ್ದೆ ಬಾರದ ರಾತ್ರಿಗಳ ಯುಗಗಳಲಿ
ಅವಳದೇ ನೆನಪ ಸರಮಾಲೆಯಲ್ಲಿ
ನನ್ನ ಮನ ಬೆಂದು ಬೇಗುದಿಯಾಗಿತ್ತು
ಮಳೆ ನೀರ ಸಿಂಚನದ ಹನಿಯಲ್ಲಿ
ತಂಪ ಕೊಡುವಂತೆ ಅವಳು ಅಂದು,
ನನ್ನ ಬಳಿಯಿಲ್ಲ ಇಂದು, ನೆನಪು
ಎದೆಗೆ ಚುಚ್ಚಿದ ಗುಂಡು ಸೂಜಿ
ಎರಡು ತೊಟ್ಟು ರಕ್ತದ ಪರಿಮಳ
ಹುರಿದುಂಬಿ ಉಕ್ಕಿ ಹರಿವ ನದಿ
ಅಂದು ಅವಳು, ನಾನೂ ತೊರೆ
ಹರಿವ ನದಿಯ ಬಿಗಿದಪ್ಪಿಕೊಳ್ವಂತೆ
ಉತ್ಸುಕದ ಮನ, ಇಂದು ನೀರಿಲ್ಲ
ಎರಡು ಕಲ್ಲ ಕೊರಡುಗಳ ಬರಡು
ಗರಿ ಬಿಚ್ಚಿ ನಲಿವ ನವಿಲು ನರ್ತನ
ಮೇಘಗಳ ಚಿಲಿಪಿಲಿ ಆಗಸದಲಿ ಅಂದು
ಹಾರಿ ಹೋಗಲು ರೆಕ್ಕೆಯಿಲ್ಲದ ಕಾಗೆ
ನಾನಿಂದು, ದನಿಯಿಲ್ಲ ಗಂಟಲಲಿ
ತ್ರಾಣವೆಲ್ಲಿ ಅವಳ ಕೂಗಿ ಅರಸಲು?
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ