ನಿರಾಸೆ

ಆಗಸದೆತ್ತರದಲಿ ಹಾರುವ ಹಕ್ಕಿಯ
ರೆಕ್ಕೆಗಳ ನೆರಳು ಗೋಚರಿಸಿತ್ತು,
ಇಣುಕಿ ನೋಡಿದೆ, ಅಲ್ಲಿರಲಿಲ್ಲ
ಮಾರು ದೂರ ಹಾರಿಯಾಗಿತ್ತು..

ನದಿಯ ತಟ, ಮರಳಿನ ರಾಶಿ
ಹರಿವ ನೀರಲಿ ಮೀನು ರೆಕ್ಕೆ
ಬಿಚ್ಚಿ ಪುಟಿಯುತ್ತಿತ್ತು, ಕ್ಷಣ ಮಾತ್ರ
ಆಳ ನೀರಲಿ ಮಾಯವಾಗಿತ್ತು...

ಧೂಳು ತುಂಬಿದ ದಾರಿಗಳ
ನಡುವೆ ಒಣಗಿದೆಲೆಗಳ ಮರ
ನೋಡಿ ನಕ್ಕಿತ್ತು ನೆರಳ ಕೊಟ್ಟು
ಒಂದು ಘಳಿಗೆಯ ಗಾಳಿ
ನೆರಳ ಸಂತಸ ಕಿತ್ತಿತ್ತು,
ಧೂಳು ತುಂಬಿದ ಕಣ್ಣೀರೊಳಗೆ
ನಕ್ಕ ಮರವೂ ಬೆತ್ತಲಾಗಿತ್ತು...