ಅಂದು ಅವಳಿಟ್ಟ ಮುತ್ತು ಕೆನ್ನೆ ತುಂಬಿದಾಗ
ತುಟಿ ಅದುರಿತ್ತು, ಕಾಮವಾಂಛೆಯ ಹಂಬಲ
ಇಂದವಳ ಮುದ್ದು ಮುಖ ನನ್ನ ಕಣ್ಣೊಳಗೆ
ಹನಿಯಾಗಿ ನಿಂತಾಗ, ತುಟಿ ಕಂಪಿಸಿತ್ತು
ನಾಲಗೆಯೂ ಅವಳ ಪ್ರೀತಿಯ ಅಳೆಯಲಿಲ್ಲ
ನನ್ನ ಕಿವಿಯೂ ಓಗೊಡಲಿಲ್ಲ, ಅವಳು ಬಯಸಿದ್ದ
ಹಿತದ ಬದುಕ, ನೋವ ನುಂಗಿ, ನಗುವ
ಉಣಿಸುವ ಹೃದಯ ವೈಶಾಲ್ಯತೆಯ ಪರಿ
ಅಲ್ಲಿ ಪ್ರೀತಿಯಿತ್ತು, ಪ್ರೇಮವಿತ್ತು, ಅದೇ
ಕಾಮದಳ್ಳುರಿಯ ಕಹಿ ಮಾರು ದೂರವಿತ್ತು
ಅಧಮ ನಾನು, ಕ್ಷಣಿಕ ಸುಖದ ಅಮಲು
ನನ್ನ ಕರುಳೊಳಗೆ ಬೆಂಕಿಯಿಟ್ಟಾಗ, ಬೂದಿ
ಆದದ್ದು ಕಪಟವಿಲ್ಲದ ಅವಳ ಒಲವ ದನಿ
ಈಗ ಮತ್ತೆ ಕಮರಿದೆ, ಹುಡುಕ ಬೇಕು
ನನ್ನ ಅಧಮತನದ ಕೊಳಕಿಗೆ ವಿಷವ
ಬೆರೆಸಿ ಹೊಡೆದೋಡಿಸುವ ಪ್ರೀತಿ ಬುಗ್ಗೆ
ಎಲ್ಲಿ ಎಲ್ಲಿ ಎಲ್ಲಿದೆ, ಅವಳಿಲ್ಲದೆ ನನಗೆ
ಸಿಗುವುದೇ ಅದರ ಸಿಹಿ ಸಿಂಚನ?
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ